A base desta experiencia é o produto. Lugo destaca pola calidade das súas materias primas e pola presenza de múltiples selos de calidade. A Ribeira Sacra lucense, amparada pola Denominación de Orixe, é un dos territorios vitivinícolas máis singulares de Galicia, con máis de 70 adegas e unha paisaxe marcada pola chamada “viticultura heroica”, debido á inclinación das súas ladeiras.

Xunto ao viño, a provincia conta cunha destacada produción queixeira, representada polas catro Denominacións de Orixe Protexidas de Galicia: Arzúa-Ulloa, San Simón da Costa, Tetilla e Cebreiro. A isto súmanse produtos como a I.G.P. Grelos de Galicia, así como a proximidade con outras zonas vitivinícolas como o VIño da Terra de Betanzos.

Todos estes produtos de calidade atopan na cidade de Lugo un espazo de confluencia. A través da hostalería, a restauración e lugares como a Praza de Abastos, o visitante pode descubrir unha gastronomía basada na proximidade, na confianza e o respecto pola orixe.